आफैँले लेखेको पुस्तक पढाउन जिशिअको दबाब

विराटनगर, १४ असोज

मोरङका शिक्षा अधिकारी प्रमोदकुमार साहले पदको दुरुपयोग गर्दै आफूले लेखेको पुस्तक जिल्लाका प्राथमिक विद्यालयमा पठनपाठन गराउन दबाब दिएका छन्　। कक्षा १ देखि ५ सम्म पढाइ हुने अंग्रेजीका ऐच्छिक पाठ्यक्रममा आधारित पुस्तक उनले लेखेका हुन्　।

जिशिअ साह र बी केलाल कर्णले संयुक्त रूपमा लेखेको ग्लोबल इंग्लिसको पुस्तक अरू अंग्रेजीपाठ्यपुस्तकभन्दा दोब्बर मूल्यको छ　। सो पुस्तक मोरङका प्रामथिक विद्यालयमा अनिवार्य अध्ययन गराउन जिशिअले दबाब दिइरहेको पाइएको छ　।

यसअघि राजेन्द्र बुढाथोकीको ऐच्छिक अंग्रेजी पढाइ भइरहेका केही विद्यालयमा शैक्षिक सत्रको बीचमा आएर उनले लेखेको पुस्तक 'गोल्डेन इंग्लिस' पढाउन थालिएको छ　। 'जिशिअ सा'बले भनेपछि १५ दिनअघिदेखि यो किताब पढाउन सुरु गरेका छौँ,' विराटनगरको एक प्राविका प्रअले आफ्नो नाम नाछाप्न आग्रह गर्दै भने, 'हाकिमले भनेको नमाने विद्यालयको काम रोकिदेलान् भन्ने डर, त्यसैले यही किताब पढाउन सुरु गरेँ　।'

विद्यार्थीले किन्न नसके विद्यालयकै स्रोतबाट भए पनि पुस्तकको पैसा मिलाउन जिशिअले भनेको समेत उनले जानकारी दिए　। जिशिअ साहले विद्यालयका प्रअलाई प्रस्ताव गरेर झापाका रिजाल थरका व्यक्तिलाई किताब पुर्‍याउने र पैसा उठाउने जिम्मा दिएका छन्　।

विराटनगरको जनपथ स्रोतकेन्द्रअन्तर्गतका ३० विद्यालयका प्राथमिक कक्षामा जिशिअ साहले लेखेको गोल्डेन इंग्लिस पढाउन सुरु गरिएको छ　। त्यसैगरी, पूर्वी मोरङका शनिश्चरे, पथरीलगायतका अधिकांश विद्यालयमा गोल्डेन इंग्लिस यसै वर्षदेखि पढाउन सुरु गरिएको छ　। यसअघि ऐच्छिक अंग्रेजी विद्यार्थीले ४० देखि ५० रुपैयाँसम्ममा किनेर पढ्दै आएका थिए　। साहका पुस्तकको मूल्य सयदेखि १६० रुपैयाँ रहेको छ　। नर्सरीको सय रुपैयाँ, कक्षा-१ को १२५ रुपैयाँ, कक्षा-२ को १३५ रुपैयाँ, कक्षा-३ को १४० रुपैयाँ, कक्षा-४ को १४७ रुपैयाँ र कक्षा-५ को १६० रुपैयाँ मूल्य रहेको छ　। गोल्डेन इंग्लिसको चर्को मूल्य तिर्नुपर्दा विद्यार्थीलाई आर्थिक भार परेको छ　।

स्रोतका अनुसार, किताबमा ३० देखि ५० प्रतिशतसम्म कमिसन विद्यालयका प्रअलाई दिइएको छ　। 'अधिकांश विद्यालयले विद्यालय सुधार योजना बनाउने पैसाबाट उक्त पुस्तक खरिद गरेका छन्,' स्रोतले भन्यो, 'त्यतिले नपुगेमा वाषिर्क मसलन्दको पैसा र सरकारले दिने पुस्तकको रकमबाट दिइरहेका छन्　।'

जिशिअ साह जिल्लाभरिका विद्यालयमा आफ्नो पुस्तक लागू गराउने तयारीमा रहेको बुझिएको छ　। जिल्लाका ५४० प्राथमिक विद्यालयमा १३ हजार ६३६ विद्यार्थी रहेका छन्　। यदि, सबै विद्यालयमा यो पुस्तक लागू गराउने हो भने पुस्तकको मूल्यअनुसार, करिब १९ लाख ८१ हजार रुपैयाँ संकलन हुन्छ　।

यता जिशिअ साह भने आफू व्यावसायिक लेखक भएकाले पुस्तक प्रकाशन गर्न पाउनुपर्ने दाबी गर्छन्　। 'म त प्रोफेसनल राइटर हुँ,' जिशिअ साहले भने, 'मैले अहिलेसम्म ९६ वटा पुस्तक लेखिसकेको छु　। त्यसमध्ये धेरै पुस्तक नेपालभरिका विद्यालयमा अनिवार्य विषय पनि पढाइ भइरहेका छन्　। मैले पुस्तक निकालेर बेच्न नपाउने ?'

उनले जिशिअको नोकरी गर्न इच्छा नहुँदा नहुँदै पनि बाध्यताले गर्नुपरेको समेत बताए　। 'मलाई यो जिशिअको जागिर खान मनै थिएन　। अझै कति किताब लेख्ने योजना छ,' साहले भने, 'बरु तपाइर्ंका भाइ-बहिनीलाई पनि चाहिन्छ भने मसँग सम्पर्क गर्नोस्　।'

जिशिअ साहले सबै स्रोतकेन्द्रमा पुस्तक किन्न दबाब दिँदै हिँडेको बुझिएको छ　। 'किताब छ, लिनोस् भनेर जिशिअले भन्नुभएको हो,' विराटचौक स्रोतकेन्द्रका पीतकुमार श्रेष्ठले भने, 'तर, हामीले अर्कै पुस्तक लगायौँ　।' नेपाल शिक्षक युनियन मोरङका अध्यक्षसमेत रहेका श्रेष्ठले जिशिअले पदीय दुरुपयोग गरी दबाब दिएर किताब किन्न लागएकोबारे आफूलाई थाहा नभएको बताए　। 'यदि दबाब दिएर किताब किन्न लगाइएको हो भने त्यस्तो गर्नु ठीक होइन,' अध्यक्ष श्रेष्ठले भने　।

शैक्षिक गणतान्त्रिक मञ्च मोरङले दबाबमा पुस्तक किन्न लगाएको भए त्यस्तो कार्य रोक्न आग्रह गरेको छ　। मञ्चका अध्यक्ष जगन निरौलाले ऐच्छिक विषय भएकाले विद्यालयले जुनसुकै लेखकको पुस्तक पढाउन सक्ने बताए　।